नेपाल रेडक्रस सोसाइटीको प्रदेश स्तरीय युवा सशक्तिकरण गोष्ठी शुक्रबारदेखि पुण्यखोलामा सुरु भएको छ ।

नेपाल रेडक्रस सोसाइटी, लुम्बिनी प्रदेशको आयोजना, नेपाल रेडक्रस सोसाइटी प्यूठान जिल्ला शाखाको समन्वय र नेपाल यु्वा रेडक्रस सर्कल, स्वर्गद्वारी बहुमुखी क्याम्पसको आतिथ्यतामा दुई दिने गोष्ठी शुरु भएको हो ।

युवा नेतृत्व परिवर्तक अभियानको जानकारी तथा उत्प्रेरणा, युवा रेडक्रस सर्कल गठन प्रक्रिया, रेडक्रसका अभियान, समस्या, चुनौती र समाधान, युवा सहभागिता लगायतका विषयमा युवाहरुलाई प्रशिक्षित गरिने नेपाल रेडक्रस सोसाइटी प्यूठान जिल्ला शाखाका सभापति गुमानराज पुलामीले जानकारी दिए ।

गोष्ठीबाट प्यूठान घोषणाको प्रस्तुती तथा पारित गर्ने तयारी रहेको छ । जिल्ला समन्वय समिति प्यूठानका प्रमुख धरम बहादुर जि.सी.ले प्रमुख अतिथिको रुपमा मन्तव्य राख्दै रेडक्रस प्राकृतिक प्रकोप तथा विपत्तीमा सहयोगी संस्था रहेकामा युवाहरुलाई समेत सशक्तिकरण गरेकोमा प्रसशां गरे ।

क्याम्पस व्यवस्थापन समितिका अध्यक्ष समेत रहेका लुम्बिनी प्रदेश सरकारका अर्थमन्त्री कृष्णध्वज खड्काले कार्यक्रमले युवाहरुमा सामाजिक भावनाको विकासमा यस गोष्ठी महत्वपूर्ण हुने विश्वास व्यक्त गरे ।

गोष्ठीमा लुम्बिनी प्रदेशको ९ जिल्लाका ३० जना सहभागी छन् ।