महोत्सवसँगै सञ्चालन गरिएको डान्स आईडलमा युवा–युवतिको आकर्षण छ ।

प्यूठान डान्स आइडल सिजन २ नामाकरण गरिएको नृत्य प्रतियोगिता महोत्सव आयोजकले नै सञ्चालन गरेको हो ।

प्रतियोगितामा सहभागी हुनेमध्ये धेरै किशोर तथा युवा उमेरका रहेको आयोजकले जनाएको छ । नृत्य प्रतियोगितामा आइडल बन्नेलाई ५० हजार नगद,ट्रफि,मेडल र प्रमाणपत्र, फस्ट रनर अप हुनेलाई ३० हजार नगद, ट्रफि, मेडल र प्रमाणपत्र र सेकेन्ड रनर अप हुनेलाई २० हजार नगद, ट्रफि, मेडल र प्रमाणपत्र दिइने आइडल संयोजक लोकेन्द्र सुनारले बताए ।

आइडलका लागि ठुलाबेसी, भिंग्री र विजुवारमा अडिसन राउन्ड गरेर ५१ जना प्रतिस्पर्धी छनोट गरिएको थियो । ५१ जना प्रतिस्पर्धी सहभागी मेघा राउन्डपछि अहिले उत्कृष्ट छनोटका लागि हरेक दिन प्रतिस्पर्धा भइरहेको छ । सोमबारसम्म १५ जना प्रतिस्पर्धी सहभागी रहेको सुनारले बताए ।

विगतमा भोटिङलाई मूल्याङ्कनको आधार बनाइएकोमा यस पटक शतप्रतिशत निर्णायकको मूल्याङ्कनलाई आधार बनाइएको आयोजकले जनाएको छ । हरेक दिन महोत्सवको सुरुवातमा आइडलका प्रतिष्पर्धीहरुले प्रस्तुति देखाउने गरेका छन् ।