सामाजिक विकास डिभिजन कार्यालय प्यूठानले आर्थिक वर्ष २०८२र८३ को स्वीकृत कार्यक्रमअन्तर्गत रोल्पा र प्यूठानका पाँच स्थानमा कुसन तथा गुडिया बनाउने तालिम सम्पन्न गरेको छ।
कार्यालयले लक्षित वर्गमा आधारित उद्यमशीलता विकास कार्यक्रमअन्तर्गत सञ्चालन गरेको १० दिने तालिमबाट करिब ११६ जना सहभागी लाभान्वित भएका छन्। तालिम स्थानीय तहका जनप्रतिनिधि तथा सरोकारवाला निकायसँगको समन्वयमा सञ्चालन गरिएको थियो।

कार्यालयका अनुसार तालिम नौबहिनी गाउँपालिका–८ फोप्लीमा जेठ १८ देखि २७ गतेसम्म, माण्डवी गाउँपालिका–३ नयाँगाउँमा जेठ २० देखि २९ गतेसम्म, स्वर्गद्वारी नगरपालिका–५ सारीमा जेठ २१ देखि ३१ गतेसम्म, रोल्पाको त्रिवेणी गाउँपालिका–५ मा जेठ २६ देखि असार ४ गतेसम्म तथा सुनछहरी गाउँपालिका–४ स्युरीमा असार १ देखि ११ गतेसम्म सञ्चालन गरिएको थियो।
तालिममा सुमित्रा नेपाली, इमा खत्री, सृजना के.एम., कल्पना डाँगी र लक्ष्मी कुँवरले प्रशिक्षण दिएका थिए।

तालिम समापन कार्यक्रममा सहभागीलाई प्रमाणपत्र तथा तालिमका क्रममा निर्माण गरिएका सामग्री वितरण गरिएको थियो। साथै अतिथिहरूलाई मायाको चिनो प्रदान गर्दै कार्यक्रम सम्पन्न गरिएको सामाजिक विकास डिभिजन कार्यालय प्यूठानका इन्जिनियर बिनोद कुमार पाण्डेले जानकारी दिए।