८ वैशाख, प्यूठानको स्वर्गद्वारी नगरपालिका वडा नं ७ का वडा सदस्य ऋषिराम घर्तीले वडा सदस्य पदबाट दिएको राजिनामा स्वीकृत भएको छ।
स्थानिय तहको निर्वाचनमा राष्ट्रिय जनमोर्चाबाट सदस्य पदमा निर्वाचित हुनुभएका घर्तीले वडा अध्यक्षले एकलौटी निर्णय गरेको भन्दै आफुले राजिनामा दिएको बताउनुभयो।
एकलौटी निर्णय हुने भएपछि हामी किन चाहियो उहाँले भन्नुभयो–“ उहाँले एकलौटी रुपमा चलाउनुहुन्छ , निर्णय पनि एकलौटी गर्नुहुन्छ उहाँकै हालीमुहाली होस्।” उहाँले वैशाख ५ गते राजिनामा दिनुभएको थियो ।
राजिनामाको बिषयमा वडा अध्यक्ष पदम प्रसाद भट्टराईले ५ गते राजिनामा दिएता पनि ३ दिन सम्म सम्पर्कमा बोलाउँदा नआउने, अनावश्यक बिरोध गर्ने भएकोले सोमबार राजिनामा स्वीकृत गरीदिएको बताउनुभयो। उहाँले नगरपालिकालाई राजिनामा स्वीकृत गरेको जानकारी गराएको समेत बताउनुभयो।
अध्यक्ष भट्टाईले आफुले एक्लै वडा अध्यक्ष जितेको र अन्य राष्ट्रिय जनमोर्चाका साथीहरुले जितेकोले आफुलाई हरेक काममा पेल्न खोजेकाले केहि बिषयमा विवाद भएता पनि छलफल गरेर अगाडि बढ्दै आएको बताउनुभयो। तत्कालिन माओबादी केन्द्रको तर्फबाट उम्मेद्वार भएका भट्टाईले वडामा आफ्नो टिमबाट एक्लै वडा अध्यक्षमा निर्वाचित भएका थिए। अन्य सदस्यहरु राष्ट्रिय जनमोर्चाका तर्फबाट उम्मेद्वार भई निर्वाचित भएका थिए।
