लायन्स क्लब अफ प्यूठानका चियर पर्शन लायन प्रविण कक्षपतिले जन्मदिनको उपलक्ष्यमा पोसाक वितरण गरेका छन् । मंगलबार प्यूठान नगरपालिका ३ स्थित शारदा आधारभुत विद्यालयमा अध्ययनरत १९ छात्र छात्रालाई विद्यार्थी पोसाक वितरण गरेका हुन् ।

विद्यार्थीहरु विना पोसाक विद्यालय आउने गरेको भन्दै विद्यालयबाट आएको सूचनालाई आधार मानी १९ जनालाई लायन्स क्लब अफ प्यूठानले जन्मदिनको अवसरमा पोसाक वितरण गरेको लायन्स क्लब प्यूठानका अध्यक्ष झविन्द्र शर्माले जानकारी दिए । उनका अनुसार लायन्सले यस अघि पनि विभिन्न संघसंस्था तथा विपन्न व्यक्तिहरुलाई जन्मदिनको अवसरमा सहयोग गर्दै आएको छ । फजुल खर्चलाई बचाएर विभिन्न संघसंस्था तथा विपन्नहरुको लागि लायन्स क्लब अफ प्यूठान सहयोगी संस्थाको रुपमा काम गरिरहेको उनले बताए ।

लायन्सले पोसाक वितरण गरेपछि विद्यालयमा सबै विद्यार्थीले पोसाक लगाएर आउने विद्यालयले जनाएको छ । लायन्स क्लब अफ प्यूठानका अध्यक्ष झविन्द्र शर्माको अध्यक्षतामा भएको पोसाक वितरण कार्यक्रममा लायन प्रविण कक्षपति, श्रीमती रीता कक्षपति, लायन्स सदस्यहरु, विद्यालयका शिक्षक शिक्षिका, विद्यार्थी लगायतको सहभागिता रहेको थियो । कार्यक्रमको सञ्चालन लायन्सका जिल्ला उपाध्यक्ष चन्द्र घर्तीले गरेका थिए ।