प्यूठान नगरपालिकाले जिल्ला स्तरीय राष्ट्रपति रनिङ शिल्ड प्रतियोगितामा प्रथम हुने खेलाडीहरुलाई सम्मान गरेको छ । नगरपालिकाले सोमबार एक कार्यक्रमको आयोजना गरी जिल्ला स्तरीय बाह्रौ राष्ट्रपति रनिङ शिल्ड प्रतियोगितामा प्रथम, द्धितीय र तृतीय स्थान हासिल गर्न सफल प्यूठान नगरपालिकाका खेलाडीहरुलाई प्रमाण पत्र र नगदले पुरस्कृत गरेको हो । खेलाडी टिमलाई नगद एक लाख भन्दा धेरै रकम सहित सम्मान गरिएको छ ।
कार्यक्रममा नगरपालिकाबाट राष्ट्रपति रनिङ शिल्ड प्रतियोगितामा एथलेटिक्स अन्तर्गतका विविध विधामा सफल भएका सहित सहभागी खेलाडीलाई समेत सम्मान गरिएको प्यूठान नगरपालिका उपप्रमुख देबेन्द्र बर्माले जानकारी दिए । खेलाडीहरुलाई खेल तर्फ उत्साहित गराउने उद्देश्यले फागुपूर्णिमा (होली) पर्व को अवसरमा नगरपालिकाले सम्मान गरेको उनले बताए ।गत फागुन १८ गतेदेखी सुरु भएको जिल्ला स्तरीय बाह्रौ राष्ट्रपति रनिङ शिल्ड प्रतियोगितामा प्यूठान नगरपालिकाले अन्य ८ वटा पालिकालाई पछि पार्दै रनिङ शिल्ड प्रतियोगिताको उपाधी जितेको थियो । नगरपालिकाले १४ स्वर्ण, ९ रजत र ५ कास्य प्राप्त गरेको थियो । प्रतियोगितामा प्यूठान नगरपालिकाबाट ७१ जना खेलाडी सहभागी भएका थिए ।