प्रथम अध्यक्ष कप पुरुष भलिबल प्रतियोगिता नौबहिनी गाउँपालिकामा सुरु भएको छ । गाउँपालिकाको आर्थिक बर्ष ०८०/०८१ स्वीकृत बार्षिक कार्यक्रम अनुसार अन्तर स्थानीय तह स्तरिय पुरुष भलिबल प्रतियोगिता २०८० सञ्चालन गर्ने निर्णय अनुसार आइतबार आजदेखि खेल सुरु भएको हो ।

कार्यक्रमका प्रमुख अतिथि तथा लुम्बिनी प्रदेश सभा सासंद तुल्सिराम शर्माले प्रतियोगिताको उद्घाटन गर्दै खेल क्षेत्रलाई विकास गर्नको लागि सबै राजनितिक दल एकजुट भएर लाग्नु पर्ने बताए । खेल क्षेत्रलाई राजनितिकिकरण गर्दा खेलाडीहरुले आफ्नो प्रतिभा देखाउन नसक्दा खेल क्षेत्र नै पछि परेको भन्दै यस्तो कार्य कोही कसैले पनि नगर्न सासंद शर्माले सबैलाई आग्रह समेत गरेका छन् ।

प्रतियोगितामा झिमरुक गाउँपालिका बाहेक जिल्लाका ८ स्थानीय तह, राप्ती गाउँपालिका दाङ, सुनिल स्मृति गाउँपालिका रोल्पा र बर्दघाट नगरपालिका नवलपरासी गरी ११ टिम सहभागि भएको नौबहिनी गाउँपालिकाका सूचना अधिकारी मेघराज बोहराले जानकारी दिए । उनका अनुसार खेल पुस ३ गते सम्म चल्ने छ । प्रतियोगितामा प्रथम हुनेले १ लाख ५० हजार, द्धितियलाई १ लाख र तृतिय हुनेलाई ५० हजार मेडल, ट्रफी र प्रमाणपत्र प्राप्त गर्ने छन् ।