२०८० चैत १५प्यूठानको माण्डवी गाउँपालिका १ त्रिवेणीमा कृषि तथा पर्यटन प्रवद्धनका लागि प्रथम माण्डवी महोत्सव सञ्चालन हुने भएको छ । बुधबार त्रिवेणी सामुदायिक ग्रामिण विकास संस्थाले देविस्थानमा पत्रकार सम्मेलन गर्दै चैत २९ देखि बैशाख ९ गतेसम्म महोत्सव आयोजना गर्ने जानकारी गराएको हो ।
माण्डवी गाउँपालिका भित्र रहेका पर्यटन प्रवद्धनमा टेवा पुग्ने र यहाँका स्थानीयले उत्पादन गरेका कृषि उपजहरुलाई बजारीकरणमा सहयोग हुने भन्दै महोत्सव गर्न लागिएको त्रिवेणी सामुदायिक ग्रामिण विकास संस्थाका अध्यक्ष रामचन्द्र पौडेलले बताए । उनका अनुसार जिल्ला भित्र रहेका सबै प्रकारका कला संस्कृतिलाई जर्गेना गर्ने र किसानले उत्पादन गरेका कृषि उपजलाई प्रोत्साहित सहित पर्यटन प्रवद्धन बढाउने लक्ष्य रहेको छ ।
महोत्सवमा स्थानीय कार्यक्रम तर्फ माण्डवी गाउँपालिका भित्रका मा.वि स्तरीय हाजिरीजवाफ र बकतृत्व कला प्रतियोगिता, माण्डवी डान्स आईडल, प्याराग्लाइडिङ, जिल्ला स्तरीय भलिबल प्रतियोगिता माण्डवी नदीमा ¥याप्टिङ हुने छ । साथै स्थानीय तथा राष्ट्रिय स्तरमा ख्याति प्राप्त कलाकारहरुको समेत प्रस्तुती हुने आयोजकले जनाएको छ ।
महोत्सवमा १ सय ५० स्टल बनाउने र ५ वटा स्टल कृषिको लागि नि:शुल्क उपलब्ध गराउने मेला व्यवस्थापन संयोजक ईमान बिष्टले बताए । उनका अनुसार ३० हजारको हाराहारीमा दर्शक भित्र्याउने लक्ष्य रहेको छ । ११ दिनसम्म चल्ने मेलामा १ सय रुपैँया टिकट रहने छ भने विद्यार्थीका लागि ८० र जेष्ठ नागरिक मध्ये ७० बर्षभन्दा माथीकालाई नि:शुल्क हुने बताईएको छ ।
