२०८१ बैशाख २५आगलागीको आरोपमा प्यूठानमा थप २ जना पक्राउ परेका छन् । यो सँगै पक्राउ पर्नेको संख्या ८ पुगेको छ । सोमबार प्यूठान नगरपालिका १० को तालरह सामुदायिक वनमा आगो लगाउँदै गरेको अवस्थामा २ जना पक्राउ परेको बन डिभिजन कार्यालय प्यूठानका सहायक बन अधिकृत हरी पौडेलले जानकारी दिए । उनका अनुसार पक्राउ पर्नेमा गौमुखी गाउँपालिकाका २ जना रहेका छन् ।
आगलागीमा संलग्न भएको आरोपमा यस अघि ६ जना पक्राउ परेका थिए । पौडेलका अनुसार पक्राउ पर्नेमा सरुमारानी ४ बाट १ जना, प्यूठान नगरपालिका ४ बाट १ जना र ऐरावती ५ बाट १ जनालाई पक्राउगरि मुद्धा दर्ता गरीएको छ । यस्तै प्यूठान नगरपालिका १० बाट १ जना, र प्यूठान नगरपालिका ९ बाट २ जना छन् ।
आगो लगाउने व्यक्तिको थप खोजी कार्यलाई तीव्र पारिएको पौडेलको भनाई छ । हालसम्म १ सय १० सामुदायिक वनमा लागेको आगो १२ हजार हेक्टर क्षेत्रफलमा फैलिएको डिभिजन वन कार्यालय प्यूठानले जनाएको छ । पक्राउ परेका व्यक्तिहरुलाई कानुनी प्रक्रियामा लगी मुद्धा चलाउने र दण्ड सजायको पनि जरिवाना गराईने कार्यालयले जनाएको छ ।
