२०८१ जेष्ठ १४माण्डवी गाउँपालिका ३ मा ३ महिने निशुल्क कम्प्यूटर तालिम सञ्चालन भएको छ । वडामा गठन भएको यूवा क्लबको मागलाई सम्बोधन गर्दै १० र १२ का परिक्षा दिएर बसेका विद्यार्थीहरुलाई मध्यनजर गरि तालिम सञ्चालन गरिएको वडाध्यक्ष धनेन्द्र कार्कीले जानकारी दिए । उनका अनुसार वडामा बजेट नभएपनि आफुले पाउने सेवासुविधाको केही हिस्सा छुट्याई तालिम सञ्चालन गरिएको हो ।
माण्डवी मा.विमा प्राविधिक धारतर्फको पढाई हुने भएकाले पनि तालिम सञ्चालनको लागि सहज पुग्ने अध्यक्ष कार्कीको भनाई छ । आवश्यकताको आधारमा विद्यार्थीहरुको सीप सिक्ने वातावरणलाई व्यवस्था गरिएको भन्दै अभिभावकले वडाध्यक्षको कामप्रति राम्रो प्रतिकृया दिएका छन् ।
सोमबार देखि औपचारिक रुपमा तालिमको उद्घाटन भएको वडाध्यक्ष कार्कीले जानकारी दिए । कक्षा सञ्चालन माण्डवी मा.वि नयाँ गाउँमा साझ साढे ४ बजेदेखि हुने बताईएको छ । तालिमको प्रशिक्षकमा दिवाकर नुनिया रहेका छन् ।
माण्डवी गाउँपालिका ३ नं वडाका यूवा क्लबको आयोजनामा भएको तालिमको आर्थिक सहयोग वडाध्यक्ष धनेन्द्र कार्की, व्यवस्थपकीय सहयोगमा माण्डवी मा.वि रहेको छ ।
माण्डवी गाउँपालिका ३ का यूवा क्लबका अध्यक्ष अभिषेश रसाईलीको अध्यक्षतामा भएको तालिमको प्रमुख अतिथि वडाध्यक्ष धनेन्द्र कार्की रहेका थिए । उद्घाटन तालिममा माण्डवी मा.विका शिक्षक, वडा सदस्य, वडा सचीव लगायत, विद्यार्थीको सहभागिता थियो ।
