सामाजिक अगुवा तथा बौद्धिक ब्यक्तित्व काली बहादुर के.सी.को स्मृतिमा श्रद्धाञ्जली कार्यक्रम सम्पन्न भएको छ । मंगलबार नेकपा माओवादी केन्द्र जिल्ला समन्वय कमिटीको आयोजनामा भएको श्रद्धाञ्जली कार्यक्रमका प्रमुख अतिथि, उक्त पार्टीका केन्द्रीय कमिटी सदस्य एवं लुम्विनी प्रदेशका पुर्व अर्थमन्त्री कृष्णध्वज खड्काले स्वर्गीय काली बहादुर केसी को निधनले पार्टी र सिंगो कम्युनिष्ट आन्दोलनलाई अपूरणीय क्षति भएको बताए । खड्काले प्यूठानको कम्युनिष्ट आन्दोलनका अगुवाको रुपमा केसीले योगदान गरेको स्मरण गर्दै केसीकी धर्मपत्नी कमला केसी, छोराहरु जोगेन्द्र केसी, विकास केसी सहित घरपरिवारमा समवेदना प्रकट गरेका थिए ।

माओवादी केन्द्र प्यूठानका संयोजक यज्ञबहादुर के.सी. प्रभातको अध्यक्षतामा भएको कार्यक्रममा पुर्व अर्थमन्त्री खड्का, माओवादी केन्द्रका केन्द्रीय सदस्य सरस्वता न्यौपाने, जिल्ला समन्वय समितिका उपप्रमुख दुर्गा रेग्मी, माण्डवी गाउँपालिकाका अध्यक्ष नवराज अधिकारी ’रोषन’, नेकपा एमाले प्यूठानका अध्यक्ष विजय विराज विष्ट, राजमो प्यूठानका अध्यक्ष ज्ञामुराम न्यौपाने लगायतको आतिथ्यता रहेको थियो ।

बुद्धिजीवी मदन बहादुर केसी ले स्वर्गीय काली बहादुर केसी को योगदानको चर्चा गरेका थिए । केसी को जेठ ४ गते निधन भएको थियो ।