नेकपा एमाले अर्घाखाँचीको नवौं जिल्ला अधिवेशन भोलि शनिबार देखी सुरु हुँदै छ । अधिवेशन सन्धिखर्कको संगम फुटल्याण्डमा हुने एमाले अर्घाखाँचीले जनाएको छ । अधिवेशनको निम्ति भूगोल तथा विशेष ईलाकाको ६५ शाखा, २१ वटा जनसंगठन र आयोजक कमिटी बाट गरी जम्मा ५ सय ६२ जना प्रतिनिधि चयन भएका छन् । नेकपा एमाले केन्द्रीय कमिटीका सचिव तथा लुम्बिनी प्रदेश कमिटीका ईन्चार्ज पद्मा अर्याल लगायतका नेताहरु अधिवेशनको लागि अर्घाखाँची पुग्ने छन् ।

अधिवेशनले पीताम्बर भुसाल नेतृत्वको टिमलाई चयन गर्ने चर्चा समेत चलेको छ । पीताम्बर नेतृत्वको जिल्ला समितिले उपलब्धि मूलक र ऐतिहासिककाम गरेकोले पदाधिकारीमा सामान्य हेरफेर गरेर पुनः उनकै नेतृत्वमा नयाँ कमिटी चयन गर्नुपर्ने एमालेका बहुसंख्यक नेता तथा कार्यकर्ताको भनाई छ । उनिहरुले पार्टीलाई संकट पर्दा भाग्ने,बखेडा झिक्ने र अधिवेशनको समयमा मलाई चाहियो भन्दै भ्रमजालको खेति गर्नेहरु प्रति सचेत बन्नु पर्ने बताउँछन् । प्रभावशाली र ओजिला नेताहरुले अध्यक्ष भुसाल नै फेरी अध्यक्ष बन्नु पर्ने बताई रहँदा केही नेताहरुले भने चर्चाकै लागि भएपनि आफुलाई अध्यक्षको प्रत्यासी वताउने गरेको एमाले कार्यकर्ताको भनाइ छ ।