प्रधानमन्त्री शेरबहादुर देउवाले अमेरिकी परियोजना मिलेनियम च्यालेन्स कर्पोरेशन (एमसीसी) पास हुने दाबी गरेका छन्। सुदूरपश्चिममा बाढी पहिरोको निरीक्षणका लागि आएका प्रधानमन्त्री देउवाले शुक्रबार बिहान धनगढीमा पत्रकारहरुले राखेको जिज्ञासामा यस्तो बताएका हुन्।

‘एमसीसी पास हुन्छ, यसका बारेमा नेपालमा झुटा हल्ला फैलाइएको छ। यसमा संसोधन गर्नुपर्ने पनि केही छैन’ देउवाले भने, ‘एमसीसी ऋण होइन, अनुदान हो। कसैले सित्तैमा पैसा दिन्छुभन्दा पनि लिन्न भन्छन् यार।’

प्रधानमन्त्री देउवाले एशियाली विकास बैंक, विश्व बैंक जस्ता अन्तराष्ट्रिय निकाय पनि आफ्नो देशको कानुन अनुसार चलिरहेको बताए। ‘एमसीसी नेपालको कानुन मुनिको हो भनिसक्यो उनीहरुले, तर पनि झुटा हल्ला फैलाइएको छ। यो त ग्रान्ट (अनुदान) हो नि’ उनले भने।

‘विश्व कैंक, एडीबीहरुमा नेपालको कानुन लागु हुँदैन। कुनै मुद्धा प¥यो भने त्यसमा अन्तराष्ट्रिय कानुन लागु हुन्छ’ देउवाले भने, ‘एमसीसीका बारेमा मुद्दा परे मात्रै अन्तर्राष्ट्रिय कानुन लागु हुन्छ।’ प्रधानमन्त्री देउवाले नेपालमा एडीबि, विश्व बैंकको ऋण आइरहेको तर अनुदान आउन नदिने चलखेल भइरहेको बताए।

अन्नपुर्णपाेष्टबाट